Përfaqësues të vendeve pjesëmarrësve në festivalin “New Born Kosova”, gjatë provave po e luajnë himnin shtetëror të Kosovës. E gjithë kjo ndodhi me iniciativën e një përfaqësueseje nga Spanja, por që nuk ishte planifikuar paraprakisht.
“Ideja ka qenë e përfaqësueses së grupit spanjoll, pjesëmarrëse në festival dhe gjithsesi ka qenë një befasi e këndshme për ne, sepse nuk ka qenë e planifikuar nga ne”, tha Arben Tahiraj, pjesë e stafit organizativ.
Spanjollja Celia Torá, tregon se si erdhi tek ideja për himnin e Kosovës.
“Ideja e himnit erdhi për të luajtur të gjithë së bashku dhe të bashkuar si një orkestër e vetme dhe jo si grup individësh. Kosova është vend i mrekullueshëm ku mirëpret kulturën e vendeve të tjera”, tha Torá.
E pjesëmarrës të vendeve të tjera tregojnë si kanë kaluar gjatë këtyre ditëve në Kosovë.
“Po ndihem mirë. Njerëzit janë të mirë dhe është kënaqësi të jem këtu. Më pëlqen festivali. Është mirë të shoh vende të ndryshme duke performuar në një skenë rreth kulturave të tyre”, tha Zan Kajzer, valltar.
“Unë jam për herë të parë në Kosovë. Festivali është i mrekullueshëm, është një himn vërtet i mirë dhe ne mund ta luajmë, është e lehtë”, tha Juraj Korman, pjesëmarrës nga Kroacia.
Festivali i vallëzimit ka nisur në Podujevë, duke vazhduar në Prizren e Deçan, ndërkaq nata finale mbyllet sonte në kryeqytet.
