Një person ka humbur jetën në zjarret pyjore që u përhapën dje në periferi të Athinës, Greqi. Trupi, i cili besohet se i përket një gruaje, u gjet në një dyqan në qytetin e Vrilissia, në veri të Athinës, tha një burim i shërbimit zjarrfikës për BBC .
Mijëra njerëz janë evakuuar pasi zjarrfikësit paralajmëruan se shtëpitë, bizneset dhe shkollat ishin në rrezik, ndërsa zjarret pritet të vazhdojnë edhe sot.
Zëdhënësi i shërbimit zjarrfikës Vassilios Vathrakogiannis tha se ndërsa nuk kishte më asnjë front aktiv zjarri në rajonin verilindor të Atikës, i cili përfshin pjesë të Athinës, kishte ende “shumë zjarre aktive lokale”, kryesisht rreth qyteteve Marathon dhe Penteli.
Koloneli Vathrakogiannis tha se dy zjarrfikës pësuan djegie ndërsa po luftonin me flakët. Zyrtarët thanë se zjarret shpërthyen dje në 40 vende të ndryshme dhe disa zona panë flakë deri në 25 metra të larta. Njerëzit në Athinë mbanin maska për fytyrën për t’u mbrojtur nga tymi që shpërtheu në qytet.
Në Penteli, një zonë e pyllëzuar kodrinore, u desh të evakuoheshin tre spitale. Zjarri përfshiu edhe fabrikën e drurit dhe shpërthime të shumta u dëgjuan gjetkë në zonë, me shumë gjasa nga rezervuarët e karburantit dhe bombolat e gazit.
Vendet evropiane kanë njoftuar ndihmë për Greqinë pasi qeveria e saj aktivizoi mekanizmin e mbrojtjes civile të përbashkët të BE-së. Italia po siguron dy avionë, ndërsa Franca dhe Serbia po ofrojnë nga një helikopter secila, tha koloneli Vathrakogiannis.
Spanja, Republika Çeke dhe Rumania po dërgojnë automjete, personel dhe ndihmë shtesë. Turqia fqinje po përgatitet gjithashtu të dërgojë dy avionë dhe një helikopter, tha ministri i Jashtëm Öncü Keçeli. Presidentja e Komisionit Evropian Ursula von der Leyen tha në X se BE “do të qëndrojë pranë Greqisë në luftën kundër zjarreve shkatërruese”.
