Në një iniciativë të rëndësishme për fuqizimin e fermerëve lokalë, veçanërisht grave, organizata TIKA në bashkëpunim me shoqatën e fermerëve ka shpërndarë pajisje të nevojshme për përmirësimin e prodhimit të qumështit.
“Falë vizitave të realizuara në komunat e Malishevës, Gjakovës dhe Vushtrrisë, kemi identifikuar nevojat e fermerëve dhe sot kemi shpërndarë pajisje të rëndësishme për 45 gra fermere,” u shpreh kryetari i shoqatës, Milazim Berisha.
Përmes këtij projekti, janë shpërndarë makina mjelëse, bidona dhe pako higjienike për fermeret, ndërsa tre pika grumbulluese të udhëhequra nga gratë kanë përfituar pajisjen laktoskan, një mjet i rëndësishëm për garantimin e cilësisë së qumështit.
“Kjo iniciativë është një hap i rëndësishëm drejt rritjes së prodhimit dhe cilësisë së qumështit në rajon,” tha Berisha, duke shtuar se “ne do të vazhdojmë me mbështetjen dhe fuqizimin e fermerëve në prodhimin e qumështit.”
Në fund, ShPQK falënderoi organizatën TIKA dhe fermerët anëtarë të shoqatës për bashkëpunimin e tyre të çmuar në këtë projekt. /Kosovatimes/
