Organizata Botërore e Shëndetësisë (OBSh) ka shpallur Mpox (dikur lija e majmunëve) emergjencë globale për shëndetin publik për herë të dytë brenda dy vjetëve, pas përhapjes së virusit në Republikën Demokratike të Kongos dhe vendet fqinje. Në përgjigje, Ministria e Shëndetësisë dhe Instituti Kombëtar i Shëndetit Publik të Kosovës (IKShPK) njoftojnë se janë duke monitoruar situatën epidemiologjike me kujdes.
Deri më tani, nuk është raportuar asnjë rast i dyshimtë në Kosovë. IKShPK është në komunikim të vazhdueshëm me OBSh-në dhe Qendrën Evropiane për Parandalimin dhe Kontrollin e Sëmundjeve (ECDC), dhe janë të gatshëm të ndërmarrin masat e nevojshme për të mbrojtur popullsinë.
Laboratorët e IKShPK-së kanë në dispozicion reagensët e nevojshëm për testimin e rasteve të dyshimta, ndërsa qytetarët këshillohen të ndjekin udhëzimet dhe të kërkojnë ndihmë mjekësore në rast dyshimi për simptoma të ngjashme me ato të Mpox. /Kosovatimes/
