Qendra Evropiane për Parandalim dhe Kontroll të Sëmundjeve (ECDC) ka rekomanduar vaksinimin kundër sëmundjes M-Pox të personave që eventualisht kanë për të udhëtuar në zonën e rrezikut në Afrikë. Ndërkohë ka rekomanduar autoritetet e shëndetit publik që të jenë të gatshme për diagnostikim të shpejtë të rasteve që eventualisht mbërrijnë në Evropë.
Ata të cilët kanë për të udhëtuar në zonat e prekura të Afrikës me M- pox apo siç njihej më përpara Lia e majmunit, duhet të konsiderojnë vaksinimin kundër kësaj sëmundjeje.
Këto rekomandime i ka dhënë Qendra Evropiane për Parandalim dhe Kontroll të Sëmundjeve, e njohur si ECDC si përgjigje ndaj përhapjes së një lloji të ri të këtij virusi. Edhe në kontinente tjera, përfshirë Evropën, mund të ketë raste me këtë sëmundje edhe pse rreziku i përhapjes është i ulët. Organizata Botërore e Shëndetësisë, ditë më parë e ka shpallur situatën me këtë situate si emergjencë globale.
Kjo sëmundje përhapet nëpërmjet kontaktit të afërt me personin e infektuar; duke dhënë dorën njëri-tjetrit, stërpikave apo spërkatjeve nga teshtima, zgjebes, përdorimit të peshqirëve të njëjtë, çarçafëve, kontaktit seksual etj.
Nga kjo sëmundje, që lidhet me një variant të ri të quajtur 1b, muajt e fundit, në Republikën Demokratike të Kongos, kanë humbur jetën të paktën 450 persona.
Ekspertët kanë thënë se ende ka shumë për tu mësuar për variantin e ri, por duket se ky variant përhapet më lehtë.
Qendra Evropiane për Parandalim dhe Kontroll të Sëmundjeve ka rekomanduar autoritetet e shëndetit publik të hartojnë plane dhe përgatiten për diagnostikim të shpejtë të rasteve të cilat eventualisht mbërrijnë në Evropë.
