Sazan Ibrahimi, drejtor ekzekutiv i Asociacionit të Komunave të Kosovës, foli për problemet e komunave të Kosovës, për bllokimin e qarkores së dytë buxhetore, mungesa e grantit të katërt, vonesat e mjeteve nga të hyrat vetanake, si dhe për subvencionimin e teksteve shkollore, ku vuri në dukje problemet dhe sfidat që kanë pasur më parë drejtorët e drejtorive në komunat e Kosovës.
Ibrahimi i ftuar në ‘InfoPlus’ tha se më së miri do të ishte që nxënësit të furnizohen në shkolla me tekstet shkollore, ngase, sipas tij, kjo do të ishte mënyra më e lehtë dhe nxënësit do të mund të nisnin mësimin më 2 shtator. Megjithatë, ai tha se drejtorët e drejtorive komunale për arsim kanë shprehur gatishmëri të bashkëpunojnë me nivelin qendror për këtë çështje.
Ibrahimi më tej tha se për këto dhe sfidat tjera i janë shpërfaqur Ministrisë së Arsimit, teksa shtoi se zgjidhje, tani për tani, nuk ka.
Tutje, Ibrahimi foli për bllokimin e qarkores buxhetore nga ministri Murati, ku, sikundër u shpreh ai, pas insistimit publik të Asociacionit, u bë zhbllokimi i qarkores së buxhetit.
“Ka disa vite që ka një moskomunikim ndërmjet komunave dhe nivelit qendror, por vetëm pas publikimit nëpër medie, atëherë Ministria iu përgjigjet kërkesave të komunave”, tha Ibrahimi, derisa shfaqi kritika për Ministrinë e Financave se po vonohet me lëshimin e qarkores, në mënyrë që, siç u shpreh ai, komunat të mund të planifikojnë investimet kapitale për vitin vijues.
Sipas Ibrahimit, komunat kanë pësuar humbje buxhetore dhjetëra milionëshe, për shkak të kontratës kolektive.
