Ministria e Punëve të Jashtme dhe Diasporës ka organizuar ceremoninë mirëpritëse për gjeneratën e tretë të programit për Diplomaci Qytetare, në të cilën morën pjesë kryeministri i Kosovës, Albin Kurti, zëvendësministrja e Punëve të Jashtme dhe Diasporës, Liza Gashi, si dhe përfaqësues të tjerë të institucioneve të vendit dhe të atyre ndërkombëtare.
Përmes një komunikate për medie bëhet e ditur se kryeministri Kurti e vlerësoi këtë program si një nismë të jashtëzakonshme që bashkon profesionistë të rinj nga diaspora, duke u dhënë mundësi dhe duke i frymëzuar ata të kontribuojnë në mënyrë aktive në zhvillimin politik, ekonomik, shoqëror dhe kulturor të vendit.
“Qeveria jonë prej kohësh ka luajtur një rol jetik në mbështetjen, por paraprakisht mirënjohjen e rolit jetik të mërgatës dhe atë si një segment kyç i strategjisë sonë kombëtare. Diaspora jo vetëm që kontribuon ndjeshëm në rritjen tonë ekonomike, por gjithashtu sjell njohuri të vyera, ekspertizë profesionale dhe perspektiva globale. Për më tepër, diaspora shërben si një urë lidhëse mes Kosovës dhe botës, duke promovuar më të mirat e vendit tonë në arenën ndërkombëtare” tha kryeministri Kurti.
Kurse zëvendësministrja Gashi i falënderoi pjesëmarrësit e këtij programi, të cilët, siç tha ajo, kanë dhënë një kontribut të çmuar për institucionet e Kosovës me angazhimin dhe profesionalizmin e tyre, duke ndikuar që ky program të vazhdojë tutje. Sipas zëvendësministres Gashi, tashmë numri i bursistëve ka kaluar mbi 50 pjesëmarrës.
Tutje, gjatë prezantimit të rrugëtimit të këtij programi para të pranishmëve, zëvendësministrja Gashi nënvizoi se kontributi për atdheun është një e drejtë universale. Ajo theksoi se ky program ka për qëllim t’i lidhë profesionistët e rinj nga diaspora, duke i inkurajuar të marrin një rol aktiv në promovimin e zhvillimit politik, ekonomik dhe socio-kulturor të Kosovës. Përmes ndarjes së përvojave të tyre, programi synon ta avancojë diplomacinë qytetare dhe ta forcojë rolin e diasporës në zhvillimin e vendit, duke përfshirë promovimin dhe prezantimin e Kosovës në arenën ndërkombëtare.
Në përmbyllje të kësaj ceremonie mirëpritëse për gjeneratën e tretë, sekretari i përgjithshëm i MPJD-së, Ilir Muçaj, së bashku me menaxheren e programit, Flaka Ismaili, ndanë certifikatat për bursistët e gjeneratës së dytë, me rastin e përfundimit të angazhimit të tyre në kuadër të Programit për Diplomaci Qytetare. /Kosovatimes/
