Nënkryetarja e Bordit të RTK-së, Albulena Mehmeti, ka reaguar pas dorëheqjes së ish-kryetarit të Bordit, Besnik Boletini dhe ish- anëtares, Arta Berisha. Ajo thotë se nuk ka dhënë dorëheqje ashtu siç ia kërkon Ligji i RTK-së, që anëtarët e Bordit mund të japin dorëheqje duke njoftuar me shkrim atë organ, të paktën, tre muaj përpara.
“Ish-kryesuesi i Bordit të RTK-së, Besnik Boletini, paraqiti publikisht disa pretendime lidhur me qëndrimet për publikimin e një lajmi në televizionin publik, por faktikisht nuk ka dhënë dorëheqje ashtu siç ia kërkon Ligji i RTK-së, që anëtarët e Bordit mund të japin dorëheqje duke njoftuar me shkrim Bordin të paktën tre (3) muaj përpara. Pra, Boletini njoftoi publikun me shkrim, por jo edhe anëtarët e Bordit”, shkruan Mehmeti në një postim në rrjetin social Facebook.
Mehmeti, tutje, thotë se vlerësimet dhe sulmet nga vet anëtarët e Bordit për stafin dhe politikën editoriale të RTK-së janë, në thelb, absurde dhe në një mënyrë të papranueshme.
“Ish-kryetari i Bordit ka shantazhuar pa ndërprerë në mënyrë të paprecedentë këdo që të realizonte kërkesat e një portali mediatik privat, e jo standardet profesionale. Në asnjë çast brenga e të dy anëtarëve nuk ka qenë RTK, por karriera e tyre personale. Dua t’ju them atyre dhe kujtdo që qëndron pas tyre se si nënkryetare e Bordit nuk do të lejoj në asnjë rast të cenohen profesionistët, të cilët punojnë për RTK-në me përkushtim dhe japin gjithçka pa asnjë rezervë”, shton tutje ajo.
Mehmeti thotë se televizioni publik duhet që sa më parë të avancojë stafin dhe të plotësojë nevojat. Ajo tutje pyet se cilat janë motivet e largimit të tyre nga Bordi i RTK-së.
“Për motivet e vërteta duhen pyetur ata. Po për sa i takon çështjeve brenda RTK-së mund të them me bindje të plotë se RTK i ka të gjithë instrumentet si institucion i madh publik që çdo proces të vetin ta përmirësojë, përshtasë, transformojë apo ngrejë në një nivel më të lartë profesional”, shkruan, pos tjerash, Mehmeti. /Kosovatimes/
