Më 9 shkurt, lideri i Lidhjes Demokratike të Kosovës (LDK), Lumir Abdixhiku, ka paralajmëruar rënien e asaj që ai e quan “Mafia Energjetike” në Kosovë, duke adresuar një sërë akuzash të rënda ndaj zyrtarëve të lartë të vendit.
“Nagip Krasniqi, drejtori i Korporatës Energjetike të Kosovës (KEK), i caktuar në këtë post nga partia në pushtet, është nën hetim nga Prokuroria Speciale për negocimin e një tenderi sekret me vlerë prej 3.4 milionë euro. Ky tender është lidhur në një kohë kur blloku A5 i KEK-ut ishte jashtë funksionit për nëntë muaj, gjatë së cilës Kosova importonte energji elektrike me kosto të jashtëzakonshme prej 1 milion eurosh në ditë, shpenzime që u bartën mbi qytetarët përmes rritjes së çmimit të energjisë për 100%.
Një tjetër emër i përfshirë në këtë aferë është ambasadori Martin Berishaj, i cili është nën hetim për rolin e tij në ndërmjetësimin e blerjes së energjisë dhe për përfitimin e dyshuar prej 2 milionë eurosh nga kompania GEN-I me seli në Beograd. Berishaj thuhet se ka tërhequr 1.5 milionë euro nga një bankë në Prishtinë, duke ngritur pikëpyetje mbi integritetin e tij”, ka shkruar Abdixhiku.
Sipas Abdixhikut, të dy zyrtarët, Krasniqi dhe Berishaj, kanë marrë mbrojtje publike nga Kryeministri i vendit, i cili ka qenë përgjegjës për emërimin e tyre në pozitat kyçe.
Abdixhiku e lidh këtë mbrojtje me rrënjët e thella të mafies energjetike në strukturat e pushtetit, duke akuzuar qeverinë për arrogancë dhe përpjekje për të intimiduar Prokurorinë dhe median.
Abdixhiku përfundon duke deklaruar se, pas 9 shkurtit, do të ketë hetime të pavarura që do të sjellin në dritë detaje të reja mbi këtë skandal dhe mbi 113 tenderët sekretë të tjerë në KEK, si dhe mbi 877 të tillë në gjithë qeverinë, të shpërndara në tre vite. /Kosovatimes/
