Ish-kryeministri Avdullah Hoti ka hedhur kritika të ashpra ndaj Albin Kurtit, duke vënë në dukje se nën udhëheqjen e tij, Kosova është nën sanksione për më shumë se një vit dhe se ka marrë paralajmërime të ashpra nga ShBA për veprimet e tij të pakoordinuara që rrezikojnë sigurinë e ushtarëve amerikanë në Kosovë.
Hoti theksoi se Kurti ka kohë që nuk pritet më në nivelet e larta të administratës amerikane, një shqetësim që ka ngritur pyetje të mëdha për marrëdhëniet e tij ndërkombëtare.
Për pjesëmarrjen së tij në konventën e demokratëve në ShBA, Hoti akuzoi Kurtin se po shfrytëzon këto platforma për të përhapur dogma që nuk i beson askush, sidomos kur faktet tregojnë një tjetër realitet në Kosovë.
Sipas Hotit, korrupsioni në vend ka lulëzuar si kurrë më parë, standardi i jetesës ka rënë ndjeshëm, dhe mbi 200 mijë të rinj kanë emigruar për shkak të mungesës së perspektivës ekonomike.
Ai gjithashtu vuri në pah se investimet e huaja janë tejet të pakta dhe kryesisht të fokusuara në blerjen e banesave nga diaspora kosovare, një situatë që sipas tij tregon qartë dështimin e politikave të Kurtit për zhvillim ekonomik. /Kosovatimes/
