Të hënën në mëngjes, jahti 56 metra Bayesian u fundos në brigjet e Siçilisë pas një stuhie të fortë. Si rezultat, një person vdiq dhe gjashtë të tjerë u zhdukën, raportoi CNN .
Pesëmbëdhjetë persona u shpëtuan nga vendi i ngjarjes. Tetë nga të shpëtuarit, përfshirë një fëmijë njëvjeçar, u dërguan në spitalet lokale. Të gjithë janë në gjendje stabile.
“Era ishte shumë e fortë. Pritej mot i keq, por jo në këtë shkallë,” tha një zëdhënës i rojes bregdetare në Palermo për Reuters.
Në total, në jahtin, i cili mban flamurin britanik, ndodheshin 22 persona: 10 anëtarë të ekuipazhit dhe 12 pasagjerë, mes të cilëve shtetas të Britanisë së Madhe, SHBA-së dhe Kanadasë.
Mësohet se rrënojat e anijes janë gjetur në një thellësi rreth 50 metra, zhytësit janë në kërkim të personave të zhdukur.
Një zëdhënës i Ministrisë së Jashtme britanike tha se autoritetet britanike kishin kontaktuar autoritetet lokale në lidhje me incidentin dhe ishin të përgatitur për të ofruar mbështetje konsullore për britanikët e prekur.
