Afaristi i njohur, Veli Halimi, i cili ka fabrikë për përpunimin e qumështit, ka bërë një thirrje të hapur për bashkatdhetarët që kanë dëshirë dhe mundësi të investojnë në Kosovë. Halimi propozon hapjen e një fabrike për prodhimin e ambalazhit plastik për qumështoret e Kosovës dhe Shqipërisë, një nevojë urgjente për të cilën nuk ekziston ende asnjë fabrikë në këto dy shtete shqiptare.
Sipas Halimit, ky biznes paraqet një mundësi shumë profitabile, duke pasur parasysh kërkesën e madhe për ambalazh plastik në tregun e Kosovës dhe Shqipërisë.
Ai thekson se për të porositur ambalazh nga Turqia, nevojitet një periudhë prej gjashtë muajsh për të zënë radhën, duke bërë kështu që prodhimi lokal të jetë një zgjidhje shumë e nevojshme dhe fitimprurëse.
Halimi i bën thirrje bashkatdhetarëve të marrin në konsideratë këtë mundësi investimi, duke theksuar se kërkesa për ambalazhe plastike në rajon është e lartë dhe gjithnjë në rritje, me mundësi për të prodhuar qindra lloje të ndryshme të ambalazheve që mund të shiten në tregun lokal dhe ndërkombëtar. /Kosovatimes/
