Prokuroria Themelore në Prizren, Departamenti i Krimeve të Rënda, ka ngritur aktakuzë kundër të pandehurit Sh.G., i cili gjendet në paraburgim.
Sipas njoftimit të Prokurorisë, i njëjti dyshohet se ka kryer veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge.
Sipas aktakuzës, i pandehuri Sh.G., me datë 02.07.2024, në ora 17:35 në pikën e kalimit kufitar të Vërmicës, pa autorizim transporton substanca apo preparate, të cilat janë shpallur me ligj si narkotikë.
“Policia kufitare kishte ndaluar automjetin e markës ‘’AUDI A8’’, të cilin ishte duke e drejtuar vëllai i të pandehurit, A.G., gjatë kontrollit të automjetit, në ulësen e pasme të tij, policia ka gjetur një qese plastike me ngjyrë të verdhë me substancë narkotike të llojit “marihunë”, në peshë të përgjithshme prej 300 gram”, thuhet në njoftim.
Sipas njoftimit të Prokurorisë, i pandehuri substancën e kishte blerë në Shëngjin të Republikës së Shqipërisë në shumën prej 500 eurosh, me qëllim që të njëjtën ta vë në qarkullim për shitje brenda territorit të Republikës së Kosovës.
Prokurori i çështjes me rastin e ngritjes së aktakuzës, thuhet se i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, i pandehuri i lartëcekur për veprën penale për të cilën akuzohet të shpallet fajtor dhe të dënohet sipas ligjit.
