Kryetari i Aleancës për Ardhmërinë e Kosovës, Ramush Haradinaj, ka akuzuar kryeministrin Albin Kurti për korrupsion. Ai ka thënë se që nga ardhja në pushtet Kurti dhe Lëvizja Vetëvendosje “e kanë vjedhur popullin e Kosovës”.
“Kur flet Kurti për korrupsionin sikur edhe për shumë tema tjera vjen një shprehje ajo fjala popullore ‘të vret natën e të vajton ditën’”, ka shkruar Haradinaj në Facebook.
Sipas tij, që nga ardhja në pushtet Kurti dhe VV me mashtrime dhe në formën më tinzare në mënyrë sistematike dhe tek resorët më të ndjeshëm vodhën popullin e Kosovës
Haradinaj ka akuzuar pushtetin për vjedhje të rezervave e të rrymës.
“Me Ridin vodhën bukën e Kosovës atëherë kur kishte frikë botërore nga kriza e bukës. Me Nagipin vodhën rrymën në kohën kur në bursa çmimi kishte arritur majat e papara. Popullit ja dyfishuan çmimin e Nagipin e Martinin që ndërmjetësoj në shitjen e rrymës serbe ende i mbrojnë dhe i mbajnë si heronj. Mbi 280 milionë euro para të popullit i larguan nga konkurrenca dhe ligji dhe me partnerë në krim i përdorën si me qenë plaqkë gjahu”, ka theksuar Haradinaj.
Kreu i AAK-së ka shkruar edhe për kontratat e klasifikuara. Në fund ka thënë se “asgjë nuk do ta ndalë deklasifikimin e tyre dhe konfrontimin e hajnive të tyre me qytetarin”.
“E shpejtë do të jetë dita kur lufta e njëmendtë kundër korrupcionit do të filloj e “vajtuesit e ditës” do të shihet se janë kriminelët më të mëdhenj të këtij vendi”, ka shkruar Haradinaj.
