Problem me ujë të pijshëm për orë të tëra kanë pasur sot edhe banorët e Rahovecit dhe Gjakovës, për shkak të defektit në gyp, por gjendja është stabilizuar pasdite.
Gjakova, Rahoveci dhe fshatrat e Lumbardhit, për shumë orë, kanë mbetur pa ujë të pijshëm.
Kjo ka ndodhur për shkak të një defekti në gypin kryesor të furnizimit ‘DN 1100’, i cili ndodhet në fshatin Qerim të komunës së Gjakovës e që ka shpërthyer sot në orët e para të mëngjesit.
Por, rreth orës 15:00 është arritur që të eliminohet defekti dhe gjendja u normalizua.
“Sot rreth orës 10.20 kemi marrë informatë që nivelet e rezervarit këtu, në Qerim, kanë filluar të bien. Menjëherë inxhinierët kanë dalë në teren, së bashku me mua, e kemi pa që është një shpërthim në një lidhëse të vjetër, rreth 40 vjet. Menjëherë kemi marrë masat, ekipet operative, siç po e shihni edhe vet, mendoj që në afate optimale gypi ‘f 1100’ e ka ataku gjithë zonën e shërbimit edhe, siç po e shihni edhe vet, brenda një kohe shumë të shkurtë ekipet shumë profesionale kanë arritur të rikthejnë furnizimin me ujë”, tha Visar Hasi, drejtor teknik në ‘KRU GJAKOVA’
Sipas zyrtarëve të kompanisë ‘KRU Gjakova’, furnizimi me ujë të pijshëm, përreth 150000 konsumatorë gjatë gjithë vitit ka qenë i rregullt.
