Shkruan: Gjon KEKA
Askush nuk mund ta ndal Lëvizjen iluministe dardane të Deçanit, as ata që deri dje, madje edhe sot kanë bërë biznes me ideologji të tilla shkatërrimtare për kombin tonë dardano-arbëror evropian.
Bota e civilizuar kur e shikon një komb apo popull, ajo së pari e shikon se sa i edukuar apo qytetëruar është ai, pastaj çfarë identiteti kombëtar, fetar dhe historik mbanë në qenien e tij, cilat janë të arriturat e tij shkencore, ekonomike, etj., dhe kur të gjitha këto i bashkon ai e sheh atë si tërësi dhe jo vetëm njërën pjesë të këtij identiteti.
Në rastin tonë pra në Kosovë ai na shikon se kush jemi ne, a jemi ne Dardan të vërtetë apo po sillemi si të tillë?, a mbajmë ndonjë simbol apo ideologji apo sistem brenda mentalitetit dhe mendjes sonë nga pushtuesit e ndryshëm? Dhe mbi të gjitha na shikon se sa jemi vërtetë të gatshëm të bëhemi pjesë e civilizimit të përbashkët evropian.
Sigurisht se askush nuk mund të pranoj në familjen e tij nëse nuk të njeh, nuk ta njeh historinë, identitetin dhe rrënjët; edhe Kosovën nuk mund ta pranojë Bashkimi Evropian në familjen e saj nëse ajo nuk e tregon veten se ajo është Dardania e Konstantinit të Madh, Pjetër Bogdanit, Nënë Terezës, Gjergj Kastriotit(Skënderbeut) etj., pra nëse ajo nuk e ka identitetin e paraardhësve të vetë, nuk e njeh veten, nuk sillet si vetvetja dhe nuk jeton e vepron si vetvetja, por me elemente apo shenja e simbole të pushtuesve të huaj të cilat i ka lënë t’i ngjiten në petkun e saj, në mendjen e saj në trupin e saj.
Në këtë kuptim mund të thuhet se nëse Kosova nuk e shpalos dhe nuk i kthehet vetvetes së saj, identitetit të saj ajo rrezikon të mbetet në pritje tek dera e Bashkimit Evropian.
Prandaj aq sa është integruar deri më sot Turqia në Evropë aq do të mund të integrohet Kosova nëse nuk i tregon së pari vetes dhe brezave se ajo është vetvetja, me identitetin e saj, rrënjët e saj, kulturën e saj burimore, shpirtin e saj kombëtar evropian dhe djepin e saj që i ka përkund shumë personalitete mbikohore dardane që kanë dhënë kontribut në civilizimin e përbashkët evropian si familje brenda këtij kontinenti.
Moti ishte koha që Kosova ta bënte këtë hap, pra hapin e kthimit kah vetja e saj, kah identiteti i saj dardan evropian e Kastriotiano-Terezian.
