Kryeministri i Kosovës, Albin Kurti në ditën e dytë të Konventës Kombëtare Demokratike, në margjina të saj ka takuar senatorët amerikanë Chris Murphy dhe Peter Welch. Ai ka thënë se është momenti i fundit që Milan Radoiçiq t`i dorëzohet autoriteteve të drejtësisë të Kosovës.
Në një postim në Facebook Kurti ka thënë se me ta ka biseduar edhe për rëndësinë e zbatimit në plotni të Marrëveshjes Bazike dhe Aneksit të Ohrit, dhe pranimit e nënshkrimit të saj nga ana e Serbisë, për të cilën Kurit thotë se shteti serb po refuzon dhe po shkel vazhdimisht marrëveshjen.
“Iu shpreha interesin dhe gatishmërinë e plotë që bashkarisht të punojmë në thellimin edhe më tej të marrëdhënieve me aleatin e partnerin tonë kryesor Shtetet e Bashkuara të Amerikës, e atë në shkëmbimin tregtar, ekonomik, por edhe më gjerë. Biseduam dhe për zgjedhjet historike presidenciale në ShBA të cilat do të mbahen më 5 nëntor dhe gjallërinë e vlerat e rrënjosura të demokracisë së fuqishme amerikane, mbi zhvillimet në vend e rajon, si dhe për rëndësinë e zbatimit në plotni të Marrëveshjes Bazike dhe Aneksit të Ohrit, dhe pranimit e nënshkrimit të saj nga ana e Serbisë, e cila po e refuzon dhe shkel në vazhdimësi marrëveshjen”, ka thënë Kurti .
Kurti, ka thënë se është momenti i fundit që Milan Radoiçiq t’i dorëzohet autoriteteve të drejtësisë të Kosovës.
“Tash kur po bëhen 11 muaj të vrasjes së rreshterit tonë policor Afrim Bunjaku në Banjskë të Zveçanit, ka ardhur koha e fundit që përgjegjësit të dalin para drejtësisë dhe kryekrimineli Millan Radojçiq t’i dorëzohet autoriteteve të Kosovës dhe për këtë kërkova që ShBA-të të bëjnë trysni mbi Beogradin zyrtar”, ka thënë Kurti.
Tutje ai ka njoftuar se para pjesëmarrjes në diskutimin e organizuar nga NDI me titull “Konventa Kombëtare Demokratike dhe Roli i Partive Politike”, ka bashkëbiseduar dhe me Kryetarin e Komitetit Kombëtar Demokrat, Jaime Harrison, në prani dhe të Presidentes së NDI, Tamara Wittes dhe Kryetarit të Bordit Drejtues të NDI, Tom Daschle.
“Në panel ishim bashkë me ish-Sekretarin e Përgjithshëm të NATO-s, Lord George Robertson dhe Ministrin e Jashtëm të Danimarkës, Lars Løkke Rasmussen”, ka shkruar Kurti. /Kosovatimes/