Në ditën e tretë të Seminarit të Gjuhës, akademik Sabri Hamiti ka prezantuar projektet aktuale albanologjike. Për projektin `Enciklopedia Shqiptare` folën edhe akademikët Mehmet Kraja edhe Nysret Krasniqi. Ky projekt është nënshkruar në vitin 2022 nga kryeministrat e dy Qeverive, Kosovës e Shqipërisë, ndërsa zbatues të saj janë Akademitë e Shkencave të të dyja vendeve.
Historia e letërsisë shqiptare është projekti më i madh afatmesëm i seksionit të gjuhësisë dhe të letërsisë të Akademisë së Shkencave dhe të Arteve të Kosovës. Kjo histori trajton letërsinë shqipe 5 shekullore në plotëni që nga fillimi e deri më sot. Kështu ka deklaruar akademik Sabri Hamiti, në ditën e tretë të Seminarit të Gjuhës, gjatë prezantimit të projekteve aktuale albanologjike.
“Historia e Letërsisë Shqipe e ASHAK-ut synon hartimin e një vepre kapitale të shkruar me kritere akademike dhe estetike. Kjo vepër nuk synon sublimimin e dijeve të deritashëm për Letërsinë Shqipe që do ta bënte një Enciklopedi utilitare, nuk kërkon bërjen e një kronologjie që do ta bënte një bibliografi kritike, nuk kufizohet në trajtimin e formave që do ta bënte mirë një Poetik Letrare, por duke lidhur Enciklopedinë me Poetikën e kurorizon dëshminë të dhënat i trajton autorët dhe veprat në një lexim dhe shkrim lexim por edhe estetik duke krijuar sitetim e kësaj Letërsie”, ka theksuar ai.
Për projektin `Enciklopedia Shqiptare` folën edhe akademik Mehmet Kraja edhe Nysret Krasniqi. Ky projekt është nënshkruar në vitin 2022 nga kryeministrat e dy Qeverive, Kosovës e Shqipërisë, e që zbatues të saj janë Akademitë e Shkencave te të dyja vendeve.
“Projekti ka afat realizimi 5 vjet, mendoj që është afat i shkurtër dhe nuk besoj që do të realizohet për 5 vjet dhe do të përfshijë dije normative të të gjitha fushave të Albanologjisë, Historisë, Trashëgimisë Kulturore, Politikës, Ekonomisë, Shkencave Sociale, Shkencave të Natyrës dhe Shkenca të Teknikës, fushës Juridike, Mjekësisë, Arismit, Kulturës, Sportit, Komunikimit Masiv etj”, ka theksuar Kraja.
Kurse Krasniqi, ka thënë se letërsia shqiptare e Kosovës, padyshim pjesë e pandarë e letërsisë shqipe por e krijuar me kushtëzime e rrethana dallueshme gjeografike, historike, politike, nga letërsia që është krijuar në Shqipëri, domosdo ka krijuar specifika të saj ideore stilistike dhe si rrjedhojë kushtëzon në formë të veçantë, apo një njohje autonome e cila bëhet e domosdoshme për trajtimin adekuat lëndës së saj në kuadër të një projekti deri tash të munguar Enciklopedik.
“Duke i marrë në dijeni këto fenomene, redaksia e fushës letrare, deri më tani, ka punuar, studiuar në tri shtylla themelore kërkimore e studimore. 1. Përcaktimi i fenomeneve mbizotëruese që shquajnë korpusin letrar të Kosovës, 2. Përcaktimi i autorëve dhe i personaliteteve letrare të Kosovës dhe 3. Kriteret e përfaqësimit të autorëve letrar të Kosovës në Enciklopedinë Shqiptare”, ka thënë ai.
Seminari Ndërkombëtar për Gjuhën, Letërsinë dhe Kulturën Shqiptare, që këtë vit shënon jubileun e 50 të tij ka vazhduar edhe me prezantimin e shumë albanologëve nga Kosova e Shqipëria dhe mbarë bota, por edhe studiues të gjuhës, letërsisë, etnologjisë, artit e kulturës shqiptare.
