Kryetari i Lidhjes Demokratike të Kosovës, Lumir Abdixhiku, vizitoi sot punimet e rrugës së re në Velani, një projekt që po transformon infrastrukturën lokale dhe lehtëson qarkullimin për banorët e zonës dhe gjithë Prishtinën.
“Rruga e re, e cila lidh drejtpërdrejt Velaninë me Matin dhe Bregun e Diellit, duke shmangur rrugicat e ngushta mes shtëpive, është një ide e thjeshtë në koncept, por me ndikim të madh”, ka shkruar Abdixhiku.
Ai theksoi se ky projekt është shembull i angazhimit dhe profesionalizmit të drejtorit të infrastrukturës në Kryeqytet, Krenar Xhaferi, i cili ka një histori suksesi në projekte të ngjashme.
“Më 9 shkurt vonesat infrastrukturore marrin fund edhe në Kosovë! Historia rrugore e Kosovës do të kompletohet brenda një mandati të vetëm. Tjetër tempo, tjetër mendësi, tjetër angazhim!”, ka thënë ai.
Banorët e Velanisë shprehin mirënjohjen e tyre, ndërsa përfundimi i projektit premton të sjellë një ndryshim të rëndësishëm për trafikun dhe sigurinë në zonë. /Kosovatimes/
