Një djalë 6-vjeçar, i cili u zhduk pesë ditë më parë, u gjet thellë në një pyll në Vietnam, raporton BBC. Dang Tien Lam, i cili jeton në provincën veriperëndimore të Yen Bai, ishte duke luajtur në një lumë me nëntë vëllezërit e motrat e tij më 17 gusht, kur ai endej nëpër kodra dhe humbi, raportuan mediat lokale.
Ai u gjet dje nga banorët e zonës të cilët dëgjuan klithmën e një fëmije teksa pastronin një arë kanelle pranë pyllit. Lam, i cili u gjet i ulur në një shkurre kassava rreth 6 km nga vendi ku u zhduk, ishte aq i dobët sa nuk mund të qëndronte.
“Jam shumë i lodhur”
“Jam shumë i lodhur, nuk mund të ngrihem, të lutem më ngri lart,” tha Lam, sipas fermerit 52-vjeçar Ly Van Nang, i cili ishte në mesin e atyre që gjetën djalin. Lam mbijetoi duke ngrënë gjethe dhe fruta të egra dhe duke pirë ujë nga një përrua, sipas raporteve të mediave lokale.
Fotot tregojnë vendasit që i ofrojnë ushqim pasi e nxorrën nga pylli. E shfaqin të veshur me një bluzë të kuqe dhe pantallona të shkurtra, të cilat ishin krejtësisht të ndotura dhe flokët i ka të shprishura.
“Kjo është një mrekulli”
“Ai më tha se kur humbi, nuk mund ta gjente rrugën për në shtëpi. Dhe sa më shumë ecte, aq më shumë humbiste,” tha Nang. Policia tha se ishte një “mrekulli” që Lam u gjet i gjallë dhe se djali ishte i qëndrueshëm. “Urime për kthimin e sigurt në familje”, kanë shkruar ata në një postim në Facebook.
Lajmi shkaktoi lehtësim në mediat sociale vietnameze, me shumë njerëz që uruan familjen e Lam dhe falënderuan ekipin e kërkimit. Autoritetet lokale kanë mobilizuar më shumë se 150 njerëz – duke përfshirë policë, ushtarë dhe vullnetarë vendas – për të kërkuar Lamën.
