Policia e Kosovës ka bërë të ditur se në dy raste të ndara ka arrestuar dy persona të dyshuar si dhe ka sekuestruar substanca narkotike të llojit heroinë dhe kokainë.
Në rastin e parë, në Prishtinë është arrestuar një shtetas i Maqedonisë së Veriut nën dyshimin se ka poseduar heroinë për ta shitur.
“Policia e Kosovës, respektivisht Drejtoria për Hetimin e Trafikimit me Narkotikë në Prishtinë, në bashkëpunim me institucione vendore të sigurisë, me datën 21.08.2024, pas një pune intensive-hetimore në terren, ka ndërmarrë hapa operativë, me ç’rast ka identifikuar një person shtetas të Maqedonisë Veriore, i cili dyshohej se kishte në posedim të gatshëm për shitje një sasi të substancës së dyshuar narkotike të llojit heroinë”, ka njoftuar Policia.
Policia thotë se të dyshuarit të lartcekur me veturë substancën narkotike ia kanë sjellë dy persona tjerë, të cilët janë larguar me veturë nga vendi i ngjarjes.
Tek i dyshuari si prova materiale janë sekuestruar dy telefona, një veturë dhe 4305 denarë.
“Pas ndërhyrjes së Policisë së Kosovës tek personi i dyshuar janë gjetur gjashtë paketime me substancë të dyshuar narkotike të llojit heroinë me peshë të përgjithshme prej 6.137.6 gramë (6 kilogramë e 137 gramë),ku vlera e substancës së dyshuar narkotike e cila është konfiskuar vlerësohet të jetë rreth 150.000 euro(njëqind e pesëdhjetë mijë euro)”, thuhet në njoftim.
Lidhur me rastin në cilësi të provave materiale Policia ka sekuestruar si dëshmi edhe 2 telefon celularë, një veturë, 4305 denarë të Maqedonisë Veriore.
Tutje thuhet se të gjitha veprimet e ndërmarra dhe dëshmitë e gjetura të sekuestruara janë kryer me autorizimin e prokurorit kujdestar.
Ndërsa personi i dyshuar është shoqëruar për intervistim në prezencë të avokatit mbrojtës dhe me vendim të prokurorit të shtetit i dyshuari ndalohet për 48 orë, kurse dy personat e tjerë janë në kërkim policor.
Ndërkaq tek rasti i dytë, në Ferizaj, gjatë kontrolles së një veture është gjetur një pako e cigareve ku kishte 38.62 gramë kokainë, me vlerë rreth 3500 euro.
“Me datën 21.08.2024, pas pranimit të disa informacioneve Policia e Kosovës në Ferizaj ka ndaluar për kontroll veturën me targa të huaja, ku gjatë kontrollit të veturës është gjetur një pako e cigareve, në brendi të së cilës ka qenë një qese najloni me substancë të dyshuar si e llojit kokainë. Nën dyshimet se mund të gjendet edhe ndonjë sasi tjetër e narkotikëve është kontrolluar një shtëpi banimi në Ferizaj, ku jeton i dyshuari, mirëpo nuk është gjetur asgjë e dyshuar”, ka njoftuar PK.
Në cilësi të provave materiale janë sekuestruar një qese najloni me substancë të dyshuar narkotike të llojit kokainë, me peshë të përgjithshme 38.62 gramë, para në monedhë letre 50 euro dhe 1500 kruna suedeze.
Policia thotë se vlera e substancës së dyshuar narkotike vlerësohet të jetë rreth 3500 euro.
Lidhur me rastin, për të gjitha veprimet është njoftuar prokurori kompetent, me urdhër të të cilit i dyshuari pas intervistimit ndalohet për 48 orë.
