Profesori i Fakultetit të Bujqësisë dhe Veterinarisë, Avni Robaj, ka bërë thirrje për maturantët që kanë pasion për kafshët, duke i inkurajuar të zgjedhin Fakultetin e Bujqësisë dhe të Veterinarisë.
“Ky drejtim ofron mundësi të shkëlqyera për një karrierë të qëndrueshme, duke përfshirë kontributin në shëndetin publik, kërkimin shkencor, dhe mbrojtjen e mjedisit”, ka shkruar Robaj.
Robaj theksoi se tregu i punës për veterinerët është shumë i gjerë, duke ofruar mundësi punësimi menjëherë pas diplomimit, si në sektorin privat ashtu edhe në atë publik.
Ai veçoi rëndësinë e veterinerëve që punojnë si profesionistë të lirë në klinika veterinare dhe të atyre që kujdesen për kafshët e prodhimit, duke i ftuar të rinjtë të bëhen pjesë e këtij profesioni me të ardhme të ndritur. /Kosovatimes/
