Etnonimi Arnaut në Lindjen e Mesme, lindja dhe zhvillimi i nacionalizmit shqiptar gjatë periudhës osmane si dhe koleksionet e stolive të argjendta shqiptare në muzeun Kunstkamera, ishin ndër temat që u shtjelluan në Institutin Albanologjik në ditën e pestë të Seminarit Ndërkombëtar për Gjuhën, Letërsinë dhe Kulturën Shqiptare.
“Lindja dhe zhvillimi i nacionalizmit shqiptar ndodhi në shekullin 19. Kuptimi i këtij nacionalizmi fillimisht nisi jashtë vendit me qëllime kulturore, por më pas u bë politik si rezultat i arsyeve të ndryshme gjatë periudhës kur Perandoria Osmane rrezikohej të shpërbëhej. Për ta, identiteti kombëtar ishte më i rëndësishëm se ai fetar”. Kështu foli historiani turk me prejardhje shqiptare, Bilgin Çelik.
Ndërsa etnologu nga Rusia, Aleksandër Novik, foli për koleksionet e stolive të argjendta shqiptare e të cilat nga viti 2021 vazhdojnë të ekspozohen në ekspozitat etnografike të Muzeut Kunstkamera.
“Janë disa foto në terren. Kemi familjen Zherka, Gëzim Zherka është argjendar i njohur, i cili është lindur në qytetin e Gjakovës pastaj ka punuar në Prizren në Kombinatin e Arteve dhe tani punon në Prishtinë. Këtu kemi edhe fotografinë me familjen Gjini nga Prizreni dhe kjo familje punon nga brezi në brez me teknikën e filigranit dhe ne kemi në muze disa stoli nga ajo familje. P.sh. ky gjerdan është bërë nga gjyshi i familjes Gjini” , tha Aleksandër Novik, etnolog rus.
Mbi etnonimin Arnaut në Lindjen e Mesme, prezenca e tij në burimet e hershme arabe dhe domethënia e tij për ruajtjen identitet të bartësve të saj, foli akademik Muhamed Mufaku. Ai tha se si pasojë, në burimet arabe të shekullit 6 dalin më shumë të dhëna për arnautët te shkrimtarët e historianët vendës prej Maroku deri në Siri.
