Asociacioni i Gazetarëve të Kosovës (AGK) organizoi një pritje për gazetarët ukrainas të strehuar në Kosovë, me rastin e shënimit të 33-vjetorit të Ditës së Pavarësisë së Ukrainës. Aktiviteti u mbajt në kuadër të programit “Gazetarët në Rezidencë”, një iniciativë që u mundëson gazetarëve ukrainas, të cilët kanë ikur nga lufta, të vazhdojnë punën e tyre si gazetarë në Kosovë.
Pjesëmarrës në këtë ngjarje ishin Ambasadori i Gjermanisë në Kosovë, Jorn Rhode, Zëdhënësja e Ambasadës së Shteteve të Bashkuara të Amerikës në Kosovë, Lindsay Jagla, si dhe bashkëpunëtorë të AGK-së që ndihmojnë në zbatimin e këtij programi. Që nga prilli 2022, programi ka lejuar gazetarët ukrainas të raportojnë për zhvillimet në Kosovë dhe Ukrainë, duke ofruar një dritare të rëndësishme për informimin e publikut.
Programi “Gazetarët në Rezidencë – Kosovë” është iniciuar nga European Centre for Press and Media Freedom (ECPMF) si pjesë e nismës mbështetëse “Voices of Ukraine”. Ai zbatohet nga AGK dhe financohet nga Qeveria e Republikës së Kosovës dhe iniciativa Hannah Arendt e Qeverisë së Gjermanisë.
Ky event përkujtoi rëndësinë e solidaritetit ndërkombëtar dhe mbështetjen e gazetarëve në kohë lufte, duke theksuar përkushtimin e Kosovës për të ofruar një hapësirë të sigurt për gazetarët ukrainas që të vazhdojnë misionin e tyre profesional. /Kosovatimes/
