Ish-kryeministri Avdullah Hoti ka kritikuar ashpër prezencën e Ministrit të Brendshëm në Trepçë, i cili dje vizitoi minierën i shoqëruar nga truprojat. Hoti e cilësoi këtë veprim si një turp për gjithë qeverinë, duke vënë theksin te Ministrja e Ekonomisë, të cilën e akuzon për mungesë përgjegjësie dhe dështim në përmirësimin e kushteve të minatorëve.
Sipas Hotit, në vend që qeveria të përqendrohet në investime, gjetjen e tregjeve për shitjen e mineraleve dhe tërheqjen e investitorëve të huaj përmes partneriteteve strategjike, ajo po fajëson minatorët për dështimet e saj. Hoti nënvizoi se është qeveria ajo që ka emëruar Bordin dhe Menaxhmentin e Trepçës, dhe jo minatorët, duke hedhur poshtë çdo përpjekje për të shfajësuar administratën aktuale.
Ai e cilësoi si propagandë premtimet elektorale për Trepçën, duke paralajmëruar se mashtrimet e qeverisë në këtë dhe fusha të tjera do të marrin fund së shpejti. /Kosovatimes/
