Shkëlzen Shehu, udhëheqës i kësaj Njësie, thotë se në shumë raste janë ndihmuar edhe nga banorët lokal, përndryshe intervenimet në situata emergjente me vetëm dy punëtorë janë tepër të vështira shprehet ai.
“Gjithmonë 24 orë duhet të jemi në gjendje gatishmërie për të gjitha fatkeqësitë, se nuk është vetëm zjarri po janë edhe ndeshjet e komunikacionit, vërshimet e të gjitha këto, pra njësia duhet me qenë e përgatitur po qe jemi mbetur në mëshirën e fatit . Me një zjarrfikës krejt komuna e Junikut, vetëm ne të dy unë si udhëheqës e një zjarrfikës jemi për momentin. Kur kemi pas zjarr në bjeshkën e Junikut janë ardhë shumë qytetarë e kanë ndihmuar. Me pajisje nuk jemi mirë, e kemi vetëm një automjet”, tha ai.
Kurse, zjarrfikësi Avdyl Krasniqi ka kërkuar më shumë vëmendje nga institucionet.
“Momentalisht jemi mbetur me vetëm një zjarrfikës, ministria nuk po na bien mas dhe kemi mbetur kështu”, tha ai.
Pavarësisht këtij numri të kufizuar, intervenimet e tyre kanë qenë të shkëlqyeshme thotë drejtori për Shërbime publike në Junik, Demokrat Ganijaj, i cili po ashtu tha se disa herë kanë bërë kërkesa në drejtim të AME – së, mirëpo pa rezultat.
“Ne kemi bërë përpjekje, kemi drejtuar kërkesa në drejtim të AME-së për hapjen e konkursit dhe rritjen e numrit të zjarrfikësve, mirëpo deri më tash nuk kemi pasur hapje të konkursit dhe realisht kërkesat tona kanë hasur në vesh të shurdhër, mirëpo presim që në vazhdim të kemi një rritje të stafit, të paktën edhe për dy zjarrfikës dhe një vozitës gjë që është më se e nevojshme. Sa i përket mjeteve kemi disa mjete mirëpo realisht nuk janë të mjaftueshme”, theksoi Demokrat Ganijaj, drejtor për Shërbime publike në Junik.
E në anën tjetër, Nexhat Behrami, zyrtar në AME i kontaktuar përmes telefonit tha se shumë shpejt pritet të shpallet konkursi për këtë Njësi, por edhe për komunat tjera në mënyrë që numri i punëtorëve zjarrfikës të plotësohet konform numrit të banorëve në çdo komune.
