Një fëmijë ka vdekur në Qendrën Klinike Universitare të Kosovës (QKUK) pasi ishte shtrirë aty dje, si pasojë e goditjes nga një veturë derisa ishte në biçikletë bashkë me një fëmijë tjetër në Korishë të Prizrenit.
Policia e Kosovës njofton se nga ky aksident dy fëmijët pësuan lëndime trupore, njëri prej tyre u hospitalizua në Repartin Ortopedik në Prizren, ndërsa tjetri është transferuar në QKUK, i cili vdiq sot në orët e para të mëngjesit.
“Fsh. Korishë-Prizren, 24.08.2024-18:50.Ka ndodhur një aksident trafiku ku të përfshirë kanë qenë një automjet me targa vendore me drejtues mashkull kosovar dhe një biçiklete me drejtues një fëmijë i cili ka qenë i shoqëruar me një fëmijë tjetër në cilësinë e pasagjerit. Si pasojë e aksidentit të dy fëmijët-viktimat meshkuj kosovarë kanë pësuar lëndime trupore. Njëri prej tyre është hospitalizuar në Repartin Ortopedik në Prizren, ndërsa tjetri është transferuar në QKUK-së . Më datë 25.08.2024-01:28 viktima e cila ka qenë në trajtim mjekësor në QKUK ka ndërruar jetë”, thuhet në në raportin 24 orësh të policisë.
Më tej thuhet se me vendim të prokurorit kujdestar, i dyshuari është dërguar në mbajtje, ndërsa trupi i pa jetë dërgohet në Institutin e Mjekësisë Ligjore (IML) për autopsi.
