Tetiana Karselnykova, e cila në Kosovë është bashkëthemeluese e Shoqatës “Urat e miqësisë Kosovë – Ukrainë”, në magazinën “Lajmet e fundit”, në RTK, ka folur për luftën në Ukrainë, por edhe për jetën e saj dhe të bashkëvendësve të tjerë në Kosovë.
Ajo tha se Rusia nisi luftën me pushtimin e Krimesë, për të vazhduar më pas me sulmet në viset tjera të Ukrainës me synimin për invadimin e plotë të saj, derisa shtoi se askund në Ukrainë nuk ka një vend të sigurt.
Karselnykova foli për festimin e pavarësisë së vendit të saj larg atdheut, e cila me këtë rast falënderoi popullin dhe institucionet kosovare për ofrimin e kushteve në integrimin e saj dhe bashkëvendësve të tjerë në Kosovë.
“Megjithatë nuk është e lehtë të jesh jashtë vendit tënd dhe dua të kthehem atje kurdo që do të përfundojë lufta, derisa ne përpiqemi të bëjmë luftën tonë edhe pse jemi larg vendit tonë për të informuar botën se çka po ndodhë në vendin tonë dhe të luftojmë lajmet e rrejshme ruse kundër Urkainës”, tha Karselnykova.
Tutje, ajo foli për jetën e saj në Kosovë, për integrimin e saj në shoqërinë kosovare, duke u njohur me kulturën dhe traditat e vendit.
