Presidentja e vendit Vjosa Osmani nuk ka mundur të takohet sot me komandantin e Komandës së Forcave të Përbashkëta Aleate në Napoli, admirali amerikan Stuart B.Munsch.
Këtë e ka konfirmuar për RTKlive Bekim Kupina, këshilltari për media i presidentes Vjosa Osmani, i cili ka thënë se presidentja është e prekur me grip sezonal dhe se takimin e paralajmëruar me Admiralin Munsch e kishte të pamundur ta zhvillojë.
“Takimi në mes të Presidentes Osmani dhe Admiralit Munsch ka qenë i konfirmuar për sot në orën 15:00, por nuk do të mund të realizohet sot për shkak se Presidentja e kishte të pamundur të dalë në zyrë shkaku i një virusi sezonal”, ka thënë Kupina për RTKlive.
Sipas Kupinës Presidentja ka biseduar me Admiralin Munch nëpërmjet telefonit dhe do të takohet me të së shpejti në njërin nga udhëtimet e radhës.
Admirali amerikan Stuart B.Munsch, po qëndron për vizitë në Kosovë.
