Kryetari i Lidhjes Demokratike të Kosovës (LDK), Lumir Abdixhiku, priti sot në Selinë Qendrore të partisë ambasadorin e Mbretërisë së Bashkuar në Kosovë, Jonathan Hargreaves. Gjatë takimit, Abdixhiku e informoi ambasadorin për përgatitjet e LDK-së për zgjedhjet e 9 shkurtit, duke prezantuar programin politik “Rruga e Re” dhe fokusin elektoral të partisë në politikat zhvillimore që adresojnë nevojat e qytetarëve.
“LDK po hyn në zgjedhje me ekip të ri, program të ri, ide të reja! Mbi të gjitha me entuziazëm të unitetit e me shpresë për të ardhmen e vendit,” deklaroi Abdixhiku.
Ai gjithashtu theksoi rëndësinë e mbështetjes ndërkombëtare për stabilitetin dhe zhvillimin demokratik të Kosovës, veçanërisht në përballjen me kundërshtarët e shtetësisë së saj.
“Mbretëria e Bashkuar ka qenë dhe mbetet aleat i ngushtë i yni në këtë drejtim. Për këtë, ne dhe populli i Kosovës mbesin mirënjohës përherë,” shtoi Abdixhiku. /Kosovatimes/
