Ministri i Kulturës, Rinisë dhe Sportit, Hajrullah Çeku, ka njoftuar për përfundimin e investimit të ri në stadiumin “Fadil Vokrri”, i cili tashmë është gati të mirëpresë ndeshje të mëdha me një fushë që plotëson standardet më të larta ndërkombëtare.
“Fusha e re është ndërtuar duke përdorur sistemin hibrid, i cili është fjala e fundit e teknologjisë në botë. Ky sistem garanton qëndrueshmëri dhe performancë të lartë të fushës në çdo kusht atmosferik,” tha Çeku.
Sipas tij, stadiumi tani ka edhe një sistem të përparuar të drenazhimit dhe ngrohjes, që siguron që fusha të jetë gjithmonë në gjendje optimale për lojë.
“Pajisjet e specializuara për mirëmbajtje janë blerë dhe stafi është trajnuar për të siguruar që fusha të mbetet në kushte të përsosura për çdo ndeshje,” shtoi ai.
Investimi, i cili është realizuar në bashkëpunim me Federatën e Futbollit të Kosovës, ka vlerën e 1.3 milionë eurove dhe është kryer nga një kompani e certifikuar nga FIFA me përvojë të gjerë në ndërtimin e fushave hibride në të gjithë botën.
Në shtator, stadiumi “Fadil Vokrri” do të presë ndeshjen e parë të Kosovës në kuadër të edicionit të ri të Ligës së Kombeve, duke shënuar një hap të rëndësishëm për sportin e futbollit në vend. /Kosovatimes/
