Helikopteri i Forcave të Armatosura të Bosnjë-Hercegovinës është rrëzuar sot rreth orës 11:00 në zonën e liqenit të Jabllanicës.
Siç konfirmohet për Klix.ba, helikopteri është rrëzuar si pasojë e një aksidenti që u ka ndodhur, por ende nuk dihen informacione më të detajuara për shkakun e problemit.
Në momentin e rrëzimit në helikopter ndodheshin katër anëtarë të ekuipazhit, njëri prej të cilëve mbeti i plagosur dhe shkalla e plagëve po përcaktohet. Sipas informacioneve jozyrtare të Klix.ba, jeta e tij nuk është në rrezik.
Policia ka shkuar në vendngjarje ku do të kryejë hetimet.
Gjithashtu, sipas informacioneve të Klix.ba nga ministria përkatëse, helikopteri është rrëzuar gjatë një stërvitje apo provash para stërvitjes së madhe të nesërme që Forcat e Armatosura të Bosnjës dhe Hercegovinës zhvillojnë çdo vit.
