Kryetari i AKR-së, Behgjet Pacolli, nëpërmjet një postimi në Facebook ka thënë se premtimet e Qeverisë për Trepçën kanë qenë ndryshe dhe se sipas tij po shkelen të drejtat njerëzore të punëtorëve.
“Veprimet e menaxhmentit të përzgjedhur nga qeveria janë në kundërshtim me normat esenciale njerëzore dhe të drejtat e punëtorëve. Premtimet e kësaj qeverie për Trepçën ishin ndryshe”, ka shkruar ai.
Pacolli e ka cilësuar si të papranueshme përjashtimin e punëtorëve nga puna, teksa ka thënë se trajtimi i dinjitetshëm i punëtoreve është çështje themelore.
“Mos ekzekutimi i pagave, shpallja e gjendjes emergjente, kërcënimet dhe fajësimi i punëtoreve për gjendjen e rëndë në miniera, si dhe masa e përjashtimeve nga puna për shkaqe që nuk lidhen me minatorët, por janë rezultat i politikave të gabuara të qeverisë dhe menaxhmentit të saj, tregojnë paaftësinë në drejtimin e ndërmarrjeve sipas rregullave ekonomike”, vazhdon postimi. /Kosovatimes/
