Deputeti i LDK-së, Driton Selmanaj, ka ngritur pikëpyetje mbi mesazhin që Kosova dërgon tek investitorët dhe investimet e huaja me rikthimin e ushtarëve gjermanë në kuadër të KFOR-it. Ai e vlerëson këtë si një tregues regresi, duke vënë në dyshim stabilitetin dhe sigurinë e vendit.
“Më 4 tetor 2018, në sheshin Shatërvan të Prizrenit u mbajt ceremonia lamtumirëse për ushtarët gjermanë të KFOR-it, të cilët shërbyen për 19 vite në qytet. Largimi i tyre u konsiderua si rezultat i avancimit të Kosovës në stabilitet dhe siguri, me një ekip të vogël që do të vazhdonte këshillimin e Forcës së Sigurisë së Kosovës”, ka shkruar ai.
Ai ka thënë se, megjithatë, në vitin 2024, Bundeswehri njofton rikthimin e një kompanie operative prej rreth 200 ushtarësh, pas shpërthimeve të dhunës që kanë kërcënuar stabilitetin e rajonit që nga viti 2022. Disa shtete të tjera të NATO-s kanë ndjekur të njëjtën rrugë.
“Çfarë mesazhi po i dërgon Kosova investitorëve të huaj? A jemi vend që garantojmë siguri dhe prodhojmë paqe, apo dërgojmë mesazhe dhune? Na duhen vlerësimet e të huajve, për të kuptuar që narrativa e LVV-së për shkatërrimin 20-vjeçar ishte thjeshtë MASHTRIM! REGRES!”, shprehet Selmanaj. /Kosovatimes/
