Kryetari i AAK-së, Ramush Haradinaj, ka kritikuar ashpër kryeministrin Albin Kurti, duke e akuzuar për mashtrim dhe keqqeverisje. Haradinaj tha se vendi nuk mund të ndërtohet me mashtrime dhe se situata e qytetarëve të Kosovës po përkeqësohet. Ai sfidoi pretendimet për rritje ekonomike dhe punësim, duke thënë se shifrat e paraqitura nga Kurti janë të manipuluara dhe të pabesueshme edhe për militantët e tij.
Haradinaj i kërkoi Kurtit të rrisë pagat dhe pensionet, duke thënë se me rritjen e buxhetit prej 35%, një rritje pagash prej 25% është e mundshme. Ai theksoi se për katër vite qeverisje nuk është krijuar asnjë vlerë e re politike apo ekonomike në Kosovë, dhe se vendi po humb miliona euro për shkak të sanksioneve të BE-së.
Duke u shprehur se Kosova ka humbur pozicionin e saj në integrimet euro-atlantike dhe marrëdhëniet me investitorët, Haradinaj shtoi se 211,749 qytetarë kanë braktisur vendin gjatë mandatit të Kurtit. Ai e akuzoi Kurtin për populizëm dhe veprime boshe, duke paralajmëruar se në këtë rrugë, as Kosova dhe as Kurti nuk do të përfitojnë, pasi “zullumi këputet për së trashi”. /Kosovatimes/
