Prokuroria Themelore në Prishtinë, në bashkëpunim me Drejtorinë për Hetimin e Krimeve Kibernetike të Policisë së Kosovës, ka realizuar një aksion të gjerë në dy lokacione në Pejë dhe Klinë, pas hetimeve disa mujore për dyshime të mashtrimit dhe shantazhit përmes internetit. Në bazë të urdhëresës së Gjykatës Themelore në Prishtinë, janë arrestuar dy persona të dyshuar, një mashkull dhe një femër (T.B dhe F.B), dhe janë sekuestruar një veturë, dëshmi të transaksioneve nga unionet financiare, dy telefona mobil, dy revole, tetë copë municion dhe një maskë.
“I dyshuari kryesor, duke përdorur rrjetet sociale me identitet të rrejshëm, joshte viktimat me pretendime për lidhje dashurie, dhe më pas kërkonte para përmes arsyetimeve të ndryshme si shërim i anëtarëve të familjes apo transferim të trupave të pajetë. Kur viktima e kuptonte mashtrimin, i dyshuari e shantazhonte me publikimin e materialeve intime”, thuhet në komunikatë.
Tutje thuhet se, rasti ka shkaktuar dëme mbi 80 mijë dollarë amerikanë dhe dyshohet për më shumë se një viktimë, të gjitha shtetase të huaja, por të nacionalitetit shqiptar.
Të dyshuarit janë dërguar në mbajtje prej 48 orësh me urdhër të Prokurorisë Themelore në Prishtinë. /Kosovatimes/
