Kryeministri Albin Kurti në 25-vjetorin e Doganës së Kosovës ka përmendur të arriturat e të hyrave ekonomike dhe një varg ngjarjesh tjera, duke përfshirë edhe vrasjen e heroit Enver Zymeri.
Ai ka përmendur shkatërrimin e djegien e pikave doganore 1 dhe 21 në Jarinje e Bërnjak në vitin 2008, teksa ka thënë se rimarrja e kontrollit të tyre ka qenë pike kthese.
“…E për këtë, është e drejtë dhe e nevojshme që ta nderojmë e përkujtojmë heroin tonë kombëtar, Enver Zymerin, i cili ra dëshmor gjatë aksionit policor në veri më 26 korrik të vitit 2011. Situata sot në veri është ndryshe nga ajo e një dekade para. Në sajë të përpjekjeve të përbashkëta, veriu i Kosovës tashmë është shembull i mirë i operacioneve dhe përpjekjeve për luftimin e kontrabandës dhe krimit të organizuar, ku nga viti 2021 janë ndërmarrë rreth 163 operacione me këtë qëllim”, ka shkruar ai në Facebook.
Tutje kryeministri ka thënë se për herë të parë Dogana ka mbledhur mbi 1 miliardë euro në shtatë mujorin e parë.
“Për herë të parë që nga themelimi, Dogana e Kosovës ka arritur të mbledhë mbi 1 miliard euro të hyra për shtatë mujorin e parë, apo 113 milionë euro më shumë se periudha e njëjtë në vitin paraprak. E kjo është bërë e mundur falë luftës ndaj korrupsionit, thjeshtëzimit të procedurave doganore, e angazhimit të palodhur të punonjësve të kësaj Agjencie, gjithmonë në bashkëpunim me akterët e shtetit, e me partnerët ndërkombëtarë”, theksoi Kurti. /Kosovatimes/
