Kryeministri i vendit, Albin Kurti, në Ditën Ndërkombëtare të Personave të Zhdukur, ka thënë se përballë e kemi një shtet gjenocidal, që e mohon të kaluarën. Por që institucionet shtetërore nuk do të heshtin, e as nuk do të ndalen së thëni të vërtetën. Ai ka bërë thirrje ndërkombëtarëve që të bëjnë trysni mbi Serbinë të zbardhen më shumë informacione për këtë çështje.
Kurti, në një postim në Facebook, ka shkruar se ankthi i familjeve është i madh, pikëllimi i thellë, mirëpo qëndrueshmëria e tyre është e lartë dhe ne u kemi borxh që të bëjmë gjithçka që të zbardhet fati i të pagjeturve dhe të gjendet vendndodhja e tyre, edhe pse në këtë betejë, përballë e kemi një shtet gjenocidal, që e mohon të kaluarën.
Sipas tij, pjesa dërmuese, afër 94 për qind të zhvarrosurve, janë në muajt e parë pas rrëzimit të regjimit të Millosheviqit dhe më pastaj nuk ka pasur vullnet në Serbi për gërmime të mëtutjeshme.
“Sivjet janë bërë edhe 20 vjet prej se në krye të Komisionit për Persona të Zhdukur në Serbi, ndodhet Velko Odalloviq, i cili ka qenë njeriu kryesor i Millosheviqit gjatë luftës në Kosovë. Në fakt, Velko Odalloviq dhe Zoran Angjellkoviq kanë qenë dy personat kryesorë. Ndërkohë që sot do të duhej të ishin në bankën e të pandehurve, të ketë gjykim të drejtë për ta dhe ndëshkim të merituar, ata janë persona të privilegjuar të regjimit të Vuçiqit, ku Odalloviq udhëheq Komisionin për persona të zhdukur në Serbi, që nga viti 2004, ndërsa Angjellkoviq mban po ashtu poste të larta, si ushtrues detyre i Drejtorit të Postës së Serbisë”, ka shkruar Kurti.
Ai më tej tha se para 10 vjetëve, arkiva e Brigadës 37 të motorizuar të ushtrisë jugosllave është klasifikuar me vendim në Serbi për 30 vjet. “Pra ajo nuk do të hapet deri në vitin 2044. Në ato arkiva, ndodhet e vërteta. Kjo është dhe arsyeja pse nuk janë të qasshme. Sepse kjo brigadë ka kryer një numër të madh të masakrave në Kosovë, sidomos në rajonin e Drenicës”.
Kurti më tej bëri thirrje ndërkombëtarëve që të bëjnë trysni ndaj Beogradit që të ndërrohet vendimi, që arkiva e Brigadës së motorizuar 37 të ushtrisë jugosllave të hapet dhe të zbardhen shumë informacione. /Kosovatimes/
