Presidenti rus, Vladimir Putin, ka paralajmëruar për të martën një vizitë në Mongoli, vend anëtar i Gjykatës Penale Ndërkombëtare, e cila ka lëshuar urdhër-arrest për presidentin rus. Kjo gjykatë ka thënë se Mongolia është e obliguar ta arrestojë presidentin rus sapo të shkelë në këtë vend.
Zyrtarët rusë kanë thënë të mos kenë ndonjë shqetësim rreth kësaj.
Zyrtarët mongolë e kanë për obligim arrestimin e presidentit rus, Vladimir Putin, nëse ai i bën vizitë këtij vendi.
Kështu kanë thënë nga Gjykata Penale Ndërkombëtare. Fadi el-Abdallah, zëdhënësi i kësaj gjykate, ka thënë për transmetuesin publik britanik se gjykata mbështetet në shtetet e saj anëtare, përfshirë Mongolinë, për t’i ekzekutuar vendimet e gjykatës.
Vizita e presidentit rus në Mongoli, që pritet të bëhet të martën, është e para vizitë e presidentit rus që i bën një vendi anëtar i Gjykatës Penale Ndërkombëtare.
Gjykata pretendon se Putin është përgjegjës për krime lufte, pasi nuk ka ndaluar dëbimin e paligjshëm të fëmijëve nga Ukraina në Rusi, qëkur ka nisur lufta.
Zyrtarët ukrainas kanë kërkuar nga Mongolia arrestimin e Vladimir Putinit me të arritur në vend. Megjithatë, zyrtarët në Kremlin kanë thënë se nuk kanë ndonjë shqetësim sa i përket vizitës.
Të gjitha aspektet e vizitës së presidentit në Mongoli janë përgatitur me seriozitet, ka thënë Dmitry Peskov, zëdhënësi i Kremlinit.
Vitin e kaluar, Putin e kishte anuluar pjesëmarrjen në një samit në Afrikë të Jugut për shkak të urdhër-arrestit të lëshuar nga GjNP.
GjNP-ja, si e tillë, nuk ka kompetenca për të arrestuar të dyshuarit, ndërsa juridiksionin e saj mund ta ushtrojë vetëm brenda vendeve anëtare.
