Deputetja e Kuvendit të Republikës së Kosovës, Hykmete Bajrami, ka kritikuar ashpër veprimet e Kryeministrit Albin Kurti, duke thënë se këto veprime nuk po e shtrijnë sovranitetin në veri dhe po dëmtojnë marrëdhëniet ndërkombëtare të Kosovës.
“Albin Kurti e ka gabim. Për tri vjet e gjysmë, Kurti nuk ka pasur asnjë rezultat në ekonomi, drejtësi, arsim dhe shëndetësi, ndërkohë që ka krijuar skena në veri duke i kthyer kundër nesh pothuajse të gjithë aleatët,” tha Bajrami. Ajo shtoi se këto veprime janë dënuar vazhdimisht nga partnerët ndërkombëtarë, duke izoluar Kosovën dhe vendosur sanksione që kanë minimizuar mbështetjen e fituar me shumë mund.
Bajrami paralajmëroi se sjelljet e qeverisë aktuale po forcojnë kapacitetet ushtarake të Serbisë, duke përmendur marrëveshjen e fundit mes Serbisë dhe Francës për blerjen e avionëve luftarakë në vlerë prej 2.8 miliardë eurosh. Ajo e quajti këtë një “katastrofë strategjike.”
“Republikës i duhet një udhëheqje që prioritizon stabilitetin, sigurinë dhe pozitën ndërkombëtare të saj. Është koha të rikthejmë aleancat tona, të rindërtojmë marrëdhëniet diplomatike dhe të sigurojmë që Kosova të mbetet një anëtare e respektuar e komunitetit ndërkombëtar,” përfundoi Bajrami, duke theksuar se e ardhmja e Kosovës varet nga rikthimi i këtyre aleancave. /Kosovatimes/
