Ansambli i Këngëve dhe Valleve “Shota” ka marrë pjesë në festivalin spanjoll në Salamanka.
Ky është edicioni i tretë i ngjarjes teksa ansambli nga Kosova ka prezantuar kulturën dhe koreografinë shqiptare.
Gjatë qëndrimit në Spanjë, ata, janë takuar edhe me zyrtarët e Bashkisë së Palencias.
Drejtori i këtij ansambli, Mehmed Xhemajli ka theksuar se performanca e Shotës është pritur me shumë entuziazëm nga publiku vendas, e që sipas tij, ka pasur mundësinë të njohë dhe të përjetojë nga afër një pjesë të rëndësishme të trashëgimisë kulturore shqiptare.
“Kjo shfaqje është një dëshmi e rëndësisë së ruajtjes dhe promovimit të traditave kombëtare në skena ndërkombëtare. Një performancë e tillë e ansamblit ‘Shota’ në Salamankë jo vetëm që pasuron skenën kulturore ndërkombëtare, por gjithashtu forcon lidhjet kulturore mes Spanjës dhe Kosovës”, ka shkruar Xhemajli në Facebook.
“Pjesëmarrja në ngjarje të tilla ka ndikim të madh në promovimin e imazhit kulturor të vendit tonë nëpër botë”, ka vlerësuar ndërkaq ministri i Kulturës, Hajrulla Çeku.
