Ish-kryeministri Ramush Haradinaj ka kritikuar ashpër qeverinë aktuale për trajtimin e sektorit të arsimit, duke e cilësuar fillimin e vitit të ri shkollor si një ditë të zakonshme, larg festës që dikur shënonte për mijëra nxënës, mësues dhe prindër.
“Nxënësit po përballen me mungesë të teksteve shkollore dhe kushte të vështira të mësimit, ndërsa mësuesit po vuajnë paga të pamjaftueshme që nuk reflektojnë dinjitetin e tyre profesional”, ka shkruar ai.
Haradinaj thekson se, përkundër angazhimeve të sindikatave për paga dhe kushte më të mira, qeveria ka vazhduar t’i shpallë ato armiqësore dhe t’i godasë mësimdhënësit financiarisht.
“Institucionet ndërkombëtare e rendisin Kosovën në fund të tabelave për cilësinë e arsimit, ndërsa mijëra nxënës dhe studentë kanë braktisur shkollimin në dy-tre vitet e fundit”, ka shkruar ai.
Haradinaj përmendi si ofendim për punëtorët e Kosovës, veçanërisht për stafin mësimor, rritjen e pagave prej vetëm 6.80 euro.
Në fund, ai uroi mësuesit, nxënësit dhe prindërit që të kenë forcë dhe kurajë për ta përballuar këtë vit të vështirë shkollor, me shpresën që të jetë i fundit me kaq sfida dhe me këtë qeveri. /Kosovatimes/
