Lidhja e Bizneseve të Kosovës ka shprehur shqetësimin për neglizhencën e bordit të KPMM, i cili nuk po punon me intensitet për të trajtuar çështjet që janë në pritje për muaj të tërë.
“Kjo situatë po sjell humbje të mëdha për bizneset dhe po shkakton stagnim në zhvillimin ekonomik|, thekson LBK. Lidhja e bizneseve kërkon që bordi dhe institucionet ndërlidhëse të zbatojnë përgjegjësitë dhe detyrimet e marra në rastin e emërimit si bord.
“Stërzgjatja emërimit të Bordit e tani mungesa e punës të bordit e ka zhytur industrinë në gjendje të rend, duke sjellë probleme të konsiderueshme për bizneset që operojnë brenda këtij sektori, e humbje të mëdha për bizneset, sidomos në dhënien e licencave. Licencimi është jetik për ta, por mungesa e veprimeve nga Bordi po sjell humbje të mëdha për ta”, thekson LBK.
Kjo situatë sipas tyre është shqetësuese për bizneset në Kosovë. Rreth 270 prej tyre sipas informacioneve janë në pritje për licencim, por pamundësia për t’u licencuar po i detyron ato të përballojnë sfida financiare të rënda, duke i çuar shumë nga to në prag të falimentimit. Makineritë dhe asetet janë të fjetura, duke ngecur operacionet dhe duke përkeqësuar gjendjen ekonomike. Me këtë rast LBK ftoi bordin e KPMM dhe Institucionin mbikëqyrës të këtij bordi, të adresojnë këtë situatë për të mbështetur bizneset dhe për të shmangur pasojat negative në ekonominë vendase. Kjo situatë është vërtet shqetësuese për bizneset.
