Tash e një kohë mijëra banorë të fshatrave të komunës së Malishevës po ballafaqohen me probleme të energjisë elektrike. Sipas tyre, ndërprerjet e rrymës janë të shpeshta dhe të gjata deri në 10 orë. Reduktimet e rrymës, përveç pengesave të tjera, kanë bërë që shumë banorë të kësaj ane të shpërngulen për në qytete të tjera.
Nga 30 anëtarë sa ka Ali Gashi nga fshati Balincë e Malishevës, vetëm ai me bashkëshorten e tij thotë jeton në fshat.
E gjithë kjo, sipas tij, si për shkak të mungesës së energjisë elektrike. Gashi thotë së reduktimet në këtë anë janë një ditë me rrymë dhe një pa të, deri në 10 orë në ditë.
“Tre djem i kam, të tretë kanë dal në qytete. E gjitha si pasojë e mungesës së rrymës, ujit..”, thotë Ali Gashi, banor i kësaj ane.
Përveç reduktimeve të energjisë, edhe cilësia e rrymës, thonë se është e dobët duke shkaktuar dëme në pajisjet shtëpiake.
“Edhe kur vjen rryma është e dobët, pajisjet dëmtohen..”, thotë banori, Miftar Thaçi.
Banorët presin nga KEDS dhe nga niveli qendror që të bëjnë një zgjidhje të përhershme për zgjidhjen e problemit me energji elektrike për qytetarët e Malishevës.
Nga KEDS thonë së në Malishevë po bëhen investime në kuadër të planit investiv. Aty, krahas projektit të “super përçuesit”, përmes të cilit do të bëhet një zgjidhje e duhur për konsumatorët tanë në Malishevë, thonë se po bëhet implementimi edhe i disa dhjetëra projekteve të tjera të rrjetit të tensionit të mesëm dhe atij të ulët.
