Të dielën, më 01 shtator, ka filluar stinori vjeshtor i garave ekipore për Ligën e Parë për meshkuj, si dhe për tri grupet e Ligës së Dytë: A, B dhe C.
Liga e Parë e meshkujve ka dhënë ndeshje interesante dhe me rivalitet. Befason kryesuesja, Drita, me dy humbje nga rivalët e drejtpërdrejtë për kreun Vushtrrinë me 0:3, si dhe nga KVPP Prizreni me 1:3. Vushtrria ka shënuar një fitore dhe ka marrë kryesimin e renditjes, kurse Hasan Prishtina ka shënuar dy fitore që i kanë mundësuar të kalojë në pozitën e dytë me pikë të njëjta si Vushtrria, por me një ndeshje më shumë. Ahmet Hoxha MK, ka shënuar fitore të ngushtë ndaj Llapushës me 3:2 dhe ka humbur 1:3 nga Hasan Prishtina. Llapusha e ka mundur Sharrin me 3:2, dhe ka humbur nga Ahmet Hoxha Mk me 2:3, kurse Sharri ka pësuar dy humbje dhe mbetet në pozitën e fundit me vetëm një pikë të arkëtuar.
Ndeshjet e Ligës së Parë për femra nuk janë shtyrë për më vonë.
Në ligën e dytë A janë zhvilluar vetëm tri ndeshje. Skënderaj e ka mundur Drenasin me 3:2 dhe Kosovarin me 3:0, Bashkimi e ka mundur Kalanë me 3:0 dhe kryeson renditjen me pikë maksimale 14, po aq sa Skënderaj, por që ka një ndeshje më shumë. Ndeshjet Shkolla-Kalaja dhe Fushë Kosova-Kosovari janë shtyrë për më vonë.
Në Ligën e Dytë B, TTC Ferizaj ka shënuar një fitore 3:1 ndaj Kaçanikut dhe e ka ruajtur kryesimin e tabelës me pikë maksimale 14, po aq ka tubuar edhe Ulpiana, por me një ndeshje më shumë. Ulpiana, në saje të dy fitoreve ndaj Gjinkallës me 3:0 dhe Gjilanit me 3:1 ka arritur në kuotën e 14 pikëve. Nga një fitore e kanë shënuar Gjinkalla ndaj SHPP Ahmet Hoxha 3:1 dhe Gjilani ndaj SHPP Ahmet Hoxha 3:1, si dhe Vitia ndaj Kaçanikut me 3:0.
Në Grupin C të Ligës së Dytë, Istogu ka vazhduar me dy fitore ndaj Fitorja të Klinës me 3:1 dhe Shqiponjave me 3:0 dhe prin bindshëm në renditje me të gjitha ndeshjet e fituara. Dy fitore ka shënuar edhe Maestro ndaj Shqiponjave dhe Fitorja me 3:0 dhe renditet e dyta me 13 pikë. Një fitore ka shënuar Shqiponjat e Zeza ndaj Vitomiricës 3:0. Ndeshja Vitomirica-Dukagjini është shtyrë.
