Trajneri i Kombëtares së Kosovës në futboll, Franco Foda, të hënën në një konferencë për media, ka folur për ndeshjet e shtatorit.
Dardanët më 6 shtator përballen me Rumaninë në ‘Fadil Vorri’, në sfidën e parë të edicionit të ri në Ligën e Kombeve, derisa tri ditë më pas Kombëtarja jonë luan në udhëtim tek Qipro.
Strategu gjerman fillimisht ka folur për ndeshjen e parë kundër Rumanisë. Ai thotë se Dardanët do të japin maksimumin për të mposhtur Rumaninë në hapje të edicionit të ri në Ligën e Kombeve.
“Të gjitha lojtarët janë në formë të shkëlqyeshme dhe për lojën e parë në shtëpi jemi jashtëzakonisht të motivuar”, ka thënë Foda.
“Do të bëjmë gjithçka që të fitojmë kundër Rumanisë”, ka deklaruar tekniku gjerman.
Kombëtarja jonë sot pasdite në Kampin Nacional të Hajvali, mban stërvitjen e parë para duelit me rumunët.
Ndeshja Kosova-Rumani luhet të premten mbrëma dhe transmetohet drejtpërdrejt në RTK.
