Kryeministri Albin Kurti ka pritur në takim fotoreporterin e njohur amerikan nga “VII Foundation”, Ron Haviv dhe me drejtorin e Festivalit Ndërkombëtar të Fotografisë që po mbahet në Kosovë, “Fotoist”, Burim Myftiun.
Ai ka bërë të ditur se në takim kanë diskutuar për zhvillimin e fotoreportazhit dhe rëndësinë e dokumentimit të ngjarjeve të rëndësishme, si për vendin tonë, ashtu edhe për mbarë botën.
Ron Haviv ka dokumentuar mbi 26 konflikte dhe luftëra, përfshirë luftën në Kosovë dhe ka punuar në më shumë se 100 vende, duke sjellë historinë përmes fotografive që kanë bërë histori.
“Nuk është hera e parë e tij në Kosovë. Sa herë që vjen e mirëpresim e gjithmonë do t’i jemi mirënjohës për guximin e tij për të dokumentuar të vërtetën mbi shpërbërjen e dhunshme të Jugosllavisë dhe të krimeve të Serbisë në Ballkan”, ka shkruar Kurti.
Ai tutje ka theksuar se libri i tij, “Blood and Honey: A Balkan War Journal” është një përmbledhje jashtëzakonisht e rëndësishme për kujtesën kombëtare dhe rikujtesën ndërkombëtare rreth të kaluarës së dhimbshme, luftës për lirinë që e gëzojmë tash e 25 vjet dhe drejtësisë që vonon edhe pas 25 vjetëve. /Kosovatimes/
