Situata në vend me theks të veçantë në veri sidomos kur sot kishte paralajmërime për mbyllje të pikave kufitare, ishte temë diskutimi në “Info Plus” në RTK. Besa Kabashi-Rama, anëtare e kryesisë së Partisë Demokratike të Kosovës, tha se kohëve të fundit veriu po instrumentalizohet dhe po shkakton problem serioze në progresin e Kosovës drejt integrimit në Bashkimin Evropian dhe në NATO ashtu siç ka qenë në plan.
“E shoh si shumë shqetësuese atë se çka po ndodh në përgjithësi në fushën e sigurisë dhe të mbrojtjes viteve të fundit”, tha Kabashi-Ramaj.
Gjithashtu, shqetësuese ajo e sheh edhe mos konsistencën mes partive në çështjen e sigurisë.
“Edhe kur ka qenë PDK në pushtet po edhe partitë tjera në situate të ndjeshme si e veriut dhe kur ka qenë në pyetje siguria kombëtare ka pasur një dozë të unifikimit. Fatkeqësisht kohëve të fundit po shohim se ka diskrepanca të mëdha dhe partia që tani është duke e qeverisë Kosovën në një far forme është duke e antagonizu të gjitha politikat e shtetit që kanë ekzistuar paraprakisht karshi çështjeve kombëtare siç është siguria dhe mbrojtja”, tha ajo.
Tutje Kabashi-Rama tha se nuk duhet që qeveria të veprojë në veri në mënyrë të njëanshme sa herë që fillon të bie përkrahja politike ndaj saj, prandaj theksoi ajo se kur është në pyetje siguria kombëtare dhe mbrojtja nga armiku kjo duhet të jetë një fushë që nuk preket fare nga politika.
Ajo tha se si PDK janë duke u siguruar që e gjithë memoria institucionale prej pavarësisë e tutje të përfshihet në një vizion 10-20 vite për Kosovën sepse siç tha ajo kështu duhet të shihet siguria dhe mbrojtja e vendit.
“Një prej pikave kryesore e programit tonë për të ardhmen e sigurisë dhe mbrojtjes ka me qenë mu avancua marrëdhënia e vendit më ShBA-në dhe QUINT-in në stade shumë më të afërta me ta përmes planeve konkrete”, tha ajo.
