Aktivistja suedeze e klimës Greta Thunberg u arrestua gjatë protestave pro-palestineze në Kopenhagë mëngjesin e sotëm. “Studentët kundër okupimit (një grup aktivist pro-palestinez) dhe unë jemi në ndërtesën e administratës së Universitetit të Kopenhagës”, shkroi Thunberg mëngjesin e sotëm në përshkrimin e videos që ajo postoi në Instagramin e saj.
Është thirrur policia, kanë hyrë me dhunë në pallat të armatosur me pushkë, po na detyrojnë dhe ne vetëm po flasim”, ka shkruar ajo. Bashkë me videon e dytë, Thunberg shtoi: “Studentët janë arrestuar dhe sapo janë dërguar në stacion”.
Protestat e kampusit në mbështetje të palestinezëve janë ndezur në mbarë botën në 11 muajt që kur grupi militant Hamas kreu një masakër brutale në Izrael që shkaktoi një operacion vdekjeprurës nga Forcat Mbrojtëse të Izraelit në Gaza dhe Bregun Perëndimor.
Gjashtë persona u arrestuan, përfshirë Thunberg
Policia në Kopenhagë tha se rreth 20 protestues u mblodhën në universitet dhe gjashtë u arrestuan, raportoi media daneze Ekstra Bladet.
TV2 i Danimarkës publikoi një video të Thunberg duke u arrestuar. Policia nuk ka konfirmuar identitetin e asnjërit prej të arrestuarve, por një zëdhënës i Studentëve Kundër Okupimit i tha Reuters se Thunberg u arrestua nga policia.
Në tetor të vitit të kaluar, ushtria izraelite kritikoi Thunberg pasi ajo dërgoi një mesazh në mbështetje të palestinezëve, menjëherë pas sulmit të Hamasit. Në dhjetor, Thunberg akuzoi Izraelin për “krime lufte” dhe “gjenocid” ndërsa ofensiva izraelite në Gaza u intensifikua.
