Përfaqësuesit e Listës Serbe, ndërhyrjen e autoriteteve të Kosovës në institucionet serbe në veri të Kosovës e kanë vlerësuar si persekutim politik të popullit serb, sepse ato institucione kanë ofruar shërbime për qytetarët.
Anëtari i Kryesisë së Listës Serbe, Igor Simiq, ka theksuar se përfaqësuesit e institucioneve serbe që kanë marrë ftesa për seanca dëgjimore do t’u përgjigjen ftesave dhe se do të thonë qartë dhe me zë të lartë se kanë punuar për të mirën e qytetarëve të të gjitha nacionaliteteve dhe se asnjëherë nuk i kanë falsifikuar dokumentet për të cilat i akuzohen.
“Ky është një persekutim politik i popullit serb sepse ato institucione kanë ofruar shërbime për qytetarët, kjo nuk është çështje e Igor Simiqit apo e Zaporozhianit, kjo është çështje e popullit, si do të bëjë populli pa ato shërbime“, ka theksuar Simiq në një konferencë për media.
Simiqi ka thënë se autoritetet e Kosovës e kanë ditur për ekzistimin e institucioneve serbe, kjo nuk është asgjë e re. “Ato institucione kanë ofruar shërbime juridike për të gjithë qytetarët”, ka thënë ai.
Sipas tij, do të “kërcënohet edhe Universiteti. Ky është momenti që ndërkombëtarët të tregojnë fytyrën, do të shohim nëse do ta bëjë, por ky është momenti”.
“Ne do t’i përgjigjemi thirrjes dhe ne ndajmë fatin e njerëzve. Nuk do të jemi serbët e parë që do të merren në pyetje”, ka thënë ai.
Pas mbylljes së institucioneve serbe, janë lëshuar urdhra që drejtuesit e Listës Serbe të merren në pyetje në polici si të dyshuar, për shkak të falsifikimit të dokumenteve.
